حقيقة النبي نشأت مجد نور الدين .. مابين الجنون والاستهزاء
من كام يوم كدة ظهر نبي جديد !!
آه والله بتكلم جد ، ظهور نبي ورسول جديد في لبنان اسمه ( نشأت مجد ) وعمل جروب ع الفيس بوك علشان يلم بيه الناس أو الاتباع بقي .
الفكرة أن في ناس بدأت تؤمن بيه فعلا !!! آه والله وأول المؤمنين بيه هي العرافة الشهيرة " كارمن شمس " مش بس كدة لا دي طلعت في بث مباشر معاه على الجروب بتاعه ووصفته أنه نور نزل من السماء إلى الأرض وعلى الجميع الإيمان به وتصديق رسالته القادمة من الله !!!
آه والله
طبعًا المصريين دخلوا علي الجروب بتاع النبي نشأت وهاتك يا كومنتات تريقة وتنمر واحنا اصلا شعب محب للسخرية والتنمر وحاجة زي دي ممكن مانسيبوش ألا أما يسيب الدين بتاعه ، قام نشأت قفش وكتب ع الجروب ممنوع دخول المصرين في الدين الجديد ، وعهد الله ما بقلش ده بجد
قالك انتم حاربتوا سيدنا موسى ويوسف وانا مش عارف حاربنا سيدنا يوسف فين !! اللي حاربوه اخواته اصلا ،وسيدنا موسى كان الإحتلال مش المصريين بس عموما يعني انا بتكلم مع مين في ايه
بعيدًا عن أن مفيش نبي ينفع يبقي أسمه نشأت أنما النبي الجديد بقى قال شوية حاجات كدة منها أن سوريا هتكون بلد أمن وهو بنفسه هيدخل بلادهم لخلاصهم من محنتهم وقيامة الحق
لا والنبي نشأت كمان عامل عروض في الدين الجديد أول ١٠ حيؤمنوا بيه حيضمن ليهم الجنة ودقايق فري
كدة ناقص ايه يا نشأت ، ناقص ايه يا نشأت !! آه معجزات هو في نبي من غير معجزات !!
نشأت امبارح كان طالع لايف عشان يعمل شوية معجزات لايف فالنت قطع عليه 
النت قطع ع النبي نشأت وهو بيعمل معجزات !!
حقيقي والله احنا وصلنا لمرحلة من العبث مش عارف أقول عليها ايه فعلا !!
الدروس المستفادة من التجربة دي هي أن نشأت أول نبي يطلع بعصاية ستارة وسكسوكه 
تعليقات
إرسال تعليق